Shayne`s Pfötliguetzli

Bevor ich Euch d Rezept vo 3erlei Cookis verrote, hani au mol no öpis für min Shayne möse bache :-)

Man nehme:

- 260g Thunfisch (im eigene Saft) z.B. gits da vo RIO bi Migros oder Coop

- 500g Dinkelvollkornmehl

- 1 dl Wasser

- 2 frischi Eier

- 4 EL natives Olivenöl

- Pfötli- oder Chnocheusstechforme (z.B. bi Coop City)

Bachofe uf 180 Grad vorheize
Dä Thunfisch imene Sieb mit kaltem Wasser abspüele und guet uuspresse
Alli Zuetate inere Schüssle zumene Teig verarbeite, er söt elastisch aber nümä chläbrig sii, suscht no bits mee Mehl däzuegee
Uf wenig Mehl dä Teig uusrolle und mit dä Förmli uussteche
grad uf ä mit Bachpapier beleits Blech lege und für 20 Min. bache.
Guet uuschüele loh bis mäs i nä Dose oderso tuet.

 Chum sinds fertig, wördeds scho stibitst :-D

Lauwarme Spargelsalot

Nur für d Feeby :-)
Wänn mä mee Ziit hät we ich, schnippled mä natürlich d Peterli & Schnittlauch selber
und chauft ganzi Spargle ....

Man nehme:

- 2 Päck grüeni Spargelspitze & 1 Pack wiissi Spargelspitze

- Gmüesbouillon

- 1 Stuck Parmesan

- Schnittlauch & Peterli

- Frischi Kresse

- Radiesli

- 1/2 Chnoblizeche

- 1 Zitrone

- 1 EL Senf

- Olivenöl

- Öpfelessig

- Tröchneti Chrüüter (Salotchrüüter oder Provence)

- Chrüütersalz

-  Pfeffer

Bouillon ufchoche und i dä Zwüschedziit d Spargel schräg i Stückli schniide, wänd Bouillon choched d Spargle drii gee und choche bis gar sind (no bits bissfest)
Fürd Vinagrette ca. 2 dl Olivenöl mit 0,5 dl Öpfelessig und dä uuspresste Zitrone (noch Gschmack) mit em Senf verrüehre, dä Chnobli, Peterli & Schnittlauch driigee, mit Salz & Pfeffer und dä tröchnete Chrüütli abschmöcke.
D Radisli i Rädli schniide und vom Parmesan fiini Spän abschniide

D Spargle abchüele loh das no lauwarm sind, mit dä Vinagrette guet vermische,
uf em Teller aarichte und mit dä Radisli, Kresse & Parmesan aarichte
 Passt guet z.B. zu mene Pouletbrüstli

Calzone-Päckli

Ich hoffe ihr händ mich nonid vogesse, in letschter Ziit han ich zwor immer koched aber leider niä Ziit gha zum Fötele oder d Rezept ufzschriebe, versuech mich aber wieder z bessere :-)

I dä Zwüschedziit ä sehr eifachs und schnells Rezept:

Pizza i Päckli-Form

Für 6 Päckli (2 - 3 Persone)

Man nehme:

- 1 rechteckige Pizzateig (i 6 Quadrat unterteile)

- Serrano-oder Rohschinke

- 6 Tomate us dä Dose (Pelatti) guet abtropft, gviertlet

- 2 Mozzarella

- Chüütersalz

- Ital. Chrüüter

- 6 Eier

- Olivenöl

1 Sechstel Teig i nä Schüsseli lege, damit i dä Mitti ä chliini Mulde entstoht.
Dä Schinke driilege, es paar Tomate- und Mozzarellastückli drilege, mit Chrüütersalz und ital.
Chrüütli würze.
1 Ei ine Tasse ufschloh und au ufs Päckli gee.
Dänn es Päckli so guets goht verschlüsse damit es Ei nid uselauft, bits mit Olivenöl beträufle
und nomol bits Chrüütersalz drufgee.
D Päckli ufs Bachblech mit Bachpapier lege und im vorgheizte Ofe bi 200 Grad ca. 10 Min. bache.

Bi üüs häts däzue en Salot mit viel frische Chrüütli, Radiesli & Croutons gee...